సాయి.బా.ని.స. డైరీ - 1995 (05)

03.03.2012 శనివారము
ఓంసాయి శ్రీసాయి జయజయ సాయిసాయి బంధువులకు బాబావారి శుభాశీస్సులు
ఈరోజు సాయి.బా.ని.స. డైరీ - 1995 5వ.భాగాన్ని చదువుకుందాము
సాయి.బా.ని.స. డైరీ - 1995 (05)
26.02.1995

జన్మలలోకెల్ల మానవ జన్మ ఉత్తమమైనది. రాత్రి నిద్రకుముందు శ్రీసాయికి నమస్కరించి మానవ జన్మలో చేయవలసిన మంచి పనులు చూపించు తండ్రీ అని వేడుకొన్నాను. శ్రీసాయి చూపిన దృశ్యాల వివరాలు.

1) జీవితము అనే బాటలో ప్రయాణము చేస్తున్నపుడు రత్నాలు, వజ్రాలు, దొరుకుతూ ఉంటాయి. వాటిని జాగ్రత్తగా ఏరుకోవాలి.

(జీవితములో మంచివారితో స్నేహము లబించుతుంది. ఆస్నేహాన్ని నిలుపుకోవాలి.)

2)జీవితములో కొన్ని సమయాలలో అహంకారముతో తప్పులు చేస్తాము. ఆ అహంకారముతొలగిపోయినపుడు మనము చేసిన తప్పులును మనము గుర్తించుతాము. అటువంటి సమయములో మనలో కలిగిన పరివర్తనను జీవితాంతమువరకు నిలుపుకోవాలి.

3) జీవితములో వివాహము స్త్రీ పురుషుల సంతోషమునకు పవిత్ర వేదిక. ఆపవిత్ర వేదికను అగ్నిజ్వాలలకు ఆహుతి చేయరాదు.
4) జీవితములో సంతోషము అనే ఫలాలు సంపాదించాలి అనే తపనతో గురువును నమ్ముకొన్నావు. నీగురువునుండి సంతోషఫలాలు అందుకొన్న తరువాత గురువును మర్చిపోవడము అంటే నమ్మకము అనే మానసిక శక్తిని నమ్మక ద్రోహము చేసినట్లే.

5) జీవితములో సుఖముగా జీవించాలి అంటే ఆకలిబాధ తీర్చుకోవాలి. ఆకలి బాధ తీర్చుకోవాలి అంటే అన్నము తినాలి. నీవు అన్నము తినేటప్పుడు నీప్రక్కవాడికి కూడా ఆకలి బాధ ఉంటుంది, వాడికి సహాయము చేయాలి అనే ఆలోచన కలిగినప్పుడు దానిని ఆచరణలో పెట్టాలి.

01.03.1995

నినంటిరోజున కుటుంబ వ్యవహారాలు, స్నేహితులతో గొడవలు, నామనసుకు చాలా చికాకు కలిగించినవి. శ్రీసాయికి నమస్కరించి సన్యాస ఆశ్రమము స్వీకరించటానికి అనుమతిని ప్రసాదించమని వేడుకొన్నాను. శ్రీ సాయి రాత్రి కలలో ఒక అజ్ఞాతవ్యక్తి రూపములో దర్శనము యిచ్చి అన్న మాటలు. "దేనికైన సమయము సందర్భము రావాలి. అంతవరకు ఓపిక పట్టాలి. నీజీవితము ఫుట్ బాల్ ఆటవంటిది. గోలు చేయటానికి నీప్రయత్నాలు నీవు చేయి. సరయిన సమయము వచ్చినపుడే నీవు గోలు చేయగలవు.అంతవరకు నీవు ఆట ఆడుతూనే యుండాలి." నిద్రనుండి మేల్కొని శ్రీసాయికి నమస్కరించినాను.

02.03.1995

రాత్రి నిద్రకు ముందు శ్రీసాయికి నమస్కరించి "సాయినాధ - నాకుటుంబ సభ్యులు అందరు మంచి మార్గములో నడవగలిగేలాగ ఆశీర్వదించు తండ్రి" అని వేడుకొన్నాను. శ్రీ సాయి అదృశ్యరూపములో యుండి అన్న మాటలు. "ఏసంసారములోనైనను సుఖశాంతులు కావాలంటే ఆయింటి యజమానురాలి నడవడిక మంచిగా యుండాలి. అపుడు ఆయింటి సభ్యులు అందరు మంచి మార్గములో నడుస్తారు.

06.03.1995

సమాజములో కొందరు వ్యక్తులు అక్రమ మార్గములో ధనసంపాదన, హోదా సంపాదన చేస్తున్నారు. అటువంటివారిని చూసినప్పుడు నామనసు చికాకుతో నిండిపోయి సాయిమార్గమునుండి తప్పుకొని వారిలాగా జీవించాలి అనే కోరిక కలుగుతున్నది. రాత్రి నిద్రకు ముందు శ్రీ సాయికి నామానసిక పరిస్థితి విన్నవించుకొని నిద్రపోయినాను. శ్రీసాయి అజ్ఞాతవ్యక్తి రూపములో దర్శనము యిచ్చి సాయింబంధువులను ఉద్దేశించి అన్న మాటలు "నీవు నిజమైన సాయి మార్గములో నడుస్తున్నపుడు నీనిజాయితీ నీకు పెద్ద పరీక్షలాగ కనబడుతుంది. అటువంటి సమయములో నీవు నడుస్తున్న మార్గము సక్రమమైనది కాదా ! అనే ప్రశ్న ఎదురవుతుంది. ఈపరీక్షలు ప్రశ్నలు దాటినవాడే నిజమైన సాయిభక్తుడు.

(యింకా ఉంది)సర్వం శ్రీసాఇనాధార్పణమస్తు

సాయి.బా.ని.స. డైరీ - 1995 (04)

02.03.2012 శుక్రవారము
ఓం సాయి శ్రీసాయి జయజయ సాయిసాయి బంధువులకు బాబావారి శుభాశీస్సులు
ఈరోజు సాయి.బా.ని.స. డైరీ - 1995 4వ.భాగాన్ని చదువుకుందాము
సాయి.బా.ని.స. డైరీ - 1995 (04)

14.02.1995

నిన్నటిరోజున మనిషిలోని స్వార్ధము దాని పరిణామాల గురించి ఆలోచించినాను. రాత్రి నిద్రకు ముందు శ్రీసాయికి నమస్కరించి మనిషిలోని స్వార్ధమును తొలగించుకునే మార్గము చూపించమని వేడుకొన్నాను. శ్రీసాయి అజ్ఞాత వ్యక్తి రూపములో దర్శనము యిచ్చి చెప్పిన మాటలు.

1) నీవు యితరులకు సహాయము చేయదలచినపుడు ఎదుటివారి సాంప్రదాయాన్ని గౌరవించుతూ సహాయము చేయవలెను.

2) నీవు ఎదుటివానితో మాట్లాడేటప్పుడు, ఎదుటివాని మాతృభాషలో నీవు అతనితో మాట్లాడటానికి ప్రయత్నము చేయవలెను.

2) నీగురువు (శ్రీసాయి) తన భక్తులలో జాతి, మత, కుల, భేదములు లేకుండ అందరిని సమానముగా ప్రేమించినారు అనే సత్యమును ఎల్లపుడు గుర్తు ఉంచుకోవలెను. ఈవిధముగా మసలుకొన్ననాడు నీలోని స్వార్ధము నిస్వార్ధముగా మారిపోతుంది.

15.02.1995

రాత్రి నిద్రముముందు శ్రీసాయికి నమస్కరించి శ్రీసాయి సత్చరిత్ర నిత్యపారాయణ కావించుచున్నానే మరి సాయి సత్ చరిత్రను సులువుగా అర్ధము చేసుకోలేకపోతున్నానే అనే బాధను శ్రీసాయి ముందు వ్యక్త పరచినాను. శ్రీ సాయి దృశ్యరూపములో యిచ్చిన సలహా.

"నీవు సత్ చరిత్ర చదువుతున్నపుడు నీవుకూడ సత్ చరిత్రలోని ఒక వ్యక్తిగాను, సాయిభక్తుడుగాను ఊహించుకొంటు చవటము అలవాటు చేసుకో. అపుడు నీవు శ్రీసాయి సత్ చరిత్రలో ఒక పాత్రధారుడివిగా నిలిచిపోతావు. సాయిసత్ చరిత్ర నీమనసులో హత్తుకునిపోతుంది."

16.02.1995

శ్రీసాయి తన భక్తులను ఉద్దేశించి నిన్నరాత్రి కలలో యిచ్చిన సందేశము వివరాలు.

1) భగవంతుని పేరిట కొబ్బరికాయ కొట్టి ప్రసాదము అందరికి పంచిపె ట్టాలి, అంతేగాని కొబ్బరిముక్కలను ఫ్రిజ్ లో పెట్టుకొని వారము రోజులపాటు కొబ్బరి చట్నీ చేసుకొని తినటముకాదు.


భగవంతునిపేరిట కొబ్బరికాయ కొట్టడము ఎందుకు? ఆభగవంతుని కించపరచటము ఎందుకు! ఒక్కసారి ఆలోచించు.

2) నీయింటికి వచ్చిన అతిధికి చల్లని మంచినీరు యివ్వటము ముఖ్యము. అంతేగాని ఆ వచ్చిన అతిదిని కూర్చోపెట్టి గాజుగ్లాసులో మంచినీరు యివ్వాలా లేదా యిత్తడిగ్లాసులో యివ్వాలా అని తర్జన భర్జన పడటము ఎంతవరకు సమంజసము - ఒక్కసారి ఆలోచించు.

22.02.1995

నిన్నటిరాత్రి శ్రీసాయికి నమస్కరించి సందేశము ప్రసాదించమని వేడుకొన్నాను. శ్రీసాయి కలలో యిచ్చిన సందేశము వివరాలు.

1) సాయిసాగరము ఒడ్డున కట్టిన గొప్పవారి మేడలమీద, బీదవారి గుడిశెలమీద, సాయిసాగరమునుండి వీచేగాలులు సమానముగానే యుంటాయి. 2) గొప్పవారు తినే రేగుపళ్ళు, బీదవారు తినే రేగుపళ్ళ రుచి ఒక్కలాగే యుంటుంది అని గుర్తుంచుకో.


25.02.1995

నిన్నటిరోజున సమాజములోని ప్రజలు వారి స్వభావాలు గురించి ఆలోచించినాను. రాత్రి నిద్రకు ముందు శ్రీసాయికి నమస్కరించి జీవితములో నేను తెలుసుకోవలసిన విషయాలు చెప్పుతండ్రీ అని వేడుకొన్నాను. శ్రీసాయి కొందరు వ్యక్తులను చూపించి వారి జీవితములో వారు చేసిన తప్పులు, వారు పడ్డ కష్ఠాలు చూపి, నీజీవితమును మంచి మార్గములో నడిపించుకోమని సందేశము యిచ్చినారు. శ్రీసాయి చూపిన దృశ్యవివరాలు.

1) జీవితములో చిన్నతనములోనే తల్లి తండ్రులను పోగొట్టుకొని ధైర్యముగా బ్రతుకుతునా ఆపిల్లలను చూడు.

2) జూదములో సర్వస్వాన్ని పోగొట్టుకొని పిచ్చివాడిలాగా తిరుగుతున్న ఆవ్యక్తిని చూడు.

3) త్రాగుడుకు బానిసగా మారి రోడ్డుమీద శవములాగ పడియున్న ఆవ్యక్తిని చూడు.

4) తన తండ్రికి ఆకులో అన్నము పెట్టడానికి వెనకాడే ఆవ్యక్తి తన మనవడికి వెండికంచములో అన్నము పెడుతున్నాడే ఆవ్యక్తిని చూడు.

5) ప్రక్కయింటివాడి స్థలములో గోతులు త్రవ్వి తన స్థలములో యిల్లు కట్టుకొంటున్న ఆలోభిని చూడు.

6) తన మతము వేరు అయినా విశాల హృదయముతో యితర సాంప్రదాయములలోని సంగీతాన్ని చక్కగా పాడుతు సంగీతములో భగవంతుని చూడగల్గిన ఆవ్యక్తిని చూడు.

7) హిందూమత దంపతులు తమకు పిల్లలు లేనప్పుడు ముస్లి ఔలియా ఆశీర్వచనాలతో పిల్లలను పొంది ఆపిల్లలకు ధైర్యముగా మస్తాన్రావు, మస్తానయ్య అని పేర్లు పెట్టుకొని సంతోషపడుతున్న తల్లితండ్రులను చూడు.

(యింకా ఉంది)
సర్వం శ్రీసాయినాధార్పణమస్తు

సాయి.బా.ని.స. డైరీ - 1995 (3)

29.02.2012 ఆదివారము
ఓం సాయి శ్రీ సాయి జయజయ సాయి
సాయి బంధువులకు బాబావారి శుభాశీస్సులు

ఈ రోజు సాయి.బా.ని.స. డైరీ - 1995 3వ.భాగాన్ని చదువుకుందాము

సాయి.బా.ని.స. డైరీ - 1995 (3)

05.02.1995

నిన్నటిరోజున శ్రీ సాయి సత్చరిత్రపై అనేక మంది రచయితలు తమకు తోచిన విధముగా వ్యాఖ్యానములు వ్రాయటము - చరిత్ర సంఘటనలనే మార్చి వేయటము నా మనసుకు చాలా బాధ కలిగించినది. నేను ఏమీ చేయలేని స్థితిలో రాత్రి నిద్రకు ముందు శ్రీ సాయికి నమస్కరించి ఈపరిస్థితిపై నీ ఆలోచనలు తెలియచేయి తండ్రీ అని వేడుకొన్నాను. శ్రీ సాయి ఒక అజ్ఞాత వ్యక్తి రూపములో దర్శనము యిచ్చి చేతిలో ఒక కొత్త గడియారాన్ని పట్టుకొని "ఈ గడియారము 1918 నాటిది.

ప్రజలు ఈ గడియారము రూపు రేఖలు మార్చగలిగినారే కాని గడియారపు యంత్రములోని పనితనాన్ని, గడియారపు ధ్వనిని మార్చలేదు సంతోషించు" అన్నారు.

07.02.1995

నిన్నటిరోజున, నాతోటివాడు కష్ఠపడి డబ్బు సంపాదించుకొంటున్నాడే అనే భావనతో ఉన్నాను. అతను లక్షాధికారి అయినాడు అనే అసూయ నాలో పెరగసాగినది. ఈ అసూయ అనేది నన్ను దహించి వేస్తున్నది. రాత్రి నిద్రకు ముందు శ్రీసాయికి నమస్కరించి ఈ అసూయను నానుండి తొలగించమని వేడుకొన్నాను. శ్రీ సాయి కలలో చూపిన దృశ్యాలు నాలోని అసూయను పారత్రోలినది. వాటి వివరాలు.

1) కళ్ళులేని భార్యభర్తలు (గుడ్డివారు) రోజు అంతా కష్ఠపడి సంపాదించిన డబ్బును నేను దొంగిలించినాను.

వారి యింట దొంగతనము చేసి పారిపోతున్న సమయములో వీధిలోనివారు నన్ను పట్టుకొన్నారు. అందరు గుమిగూడి నన్ను కఱ్ఱలతో కొట్టసాగినారు. నాకు నిద్రనుండి మెలుకువ వచ్చినది. యిటువంటి పరిస్థితికి కారణము నాలోని అసూయ కదా అని భావించి శ్రీసాయికి నమస్కరించి నిద్రపోయినాను.

శ్రీ సాయి చూపిన మరొక దృశ్యము 2) అది కాకినాడలోని మేము అద్దెకు ఉన్నయిల్లు (1964 - 65). నాకు నాపొరుగువారిపై చాలా అసూయ. ఒక ఫకీరు ;మాయింటికి వచ్చి ఈ అసూయ అనేది కుష్ఠురోగమువంటిది. అది యితరులకు అంటుకోదు. కాని నిన్ను మాత్రము పీడించి, పిప్పి చేస్తుంది. అందుచేత ఈ అసూయను నీనుండి తొలగించుకో అన్నారు. కుష్ఠురోగము అనే మాటకు నేను భయముతో నిద్రనుండి లేచినాను.

శ్రీసాయి ఈవిధముగా నానుండి అసూయను తొలగించటానికి హెచ్చరిక చేసినారు అని భావించినాను.

08.02.1995

నిన్నటిరోజున, మనయింటికి అతిధి వస్తే ఏవిధముగా మర్యాద చేయాలి, ఆధ్యా త్మికముగా అతిధిని ఏవిధముగా భావించాలి అనే విషయాలు చెప్పమని శ్రీసాయిని వేడుకొన్నాను. శ్రీ సాయి దృశ్యరూపములో చె ప్పిన విషయాలు.

1) నీయింటికి వచ్చిన అతిధికి మర్యాద చేసి అతన్ని సంతోషపెట్టు. అమర్యాద చేసిననాడు ఆవ్యక్తి పగపట్టి తగిన అవకాశము దొరికిననాడు ప్రతీకారము తీర్చుకొనుటకు ఎదురుచూస్తూ ఉంటాడు. మనం ఎవరికైన బాకీ యుంటేనే వాళ్ళు అతిధిరూపములో మన యింటికి వస్తారు.

09.02.1995

నిన్నటిరోజున నాకుటుంబ సభ్యులలో ఒకరికి భార్యా వియోగము జరిగినది. ఆయన వయస్సు సుమారు 60 సంవత్సరములు. ఆయన తన బరువు బాధ్యతలు అన్నీ పూర్తిచేసుకొని ఏకాంతముగా యున్నారు. మరి ఆయన తిరిగి వివాహము చేసుకొన్న మంచిదా ! కాదా ! అనే అలోచన నామనసులో కలిగినది. యిటువంటి పరిస్థితిలో శ్రీసాయి సలహా ఏమిటి అని ఆలోచించుతూ రాత్రి నిద్రపోయినాను. శ్రీసాయి అజ్ఞాత వ్యక్తి రూపములో దర్శనము యిచ్చి అన్న మాటలు. "జీవిత భాగస్వామి వియోగాన్ని మరచిపోవటానికి నీప్రేమను, ప్రేమను నోచుకోని అనాధపిల్లలకు పంచిపెట్టు. అంతేగాని భార్యవియోగములోని బాధలు మరచిపోవటానికి మాత్రము తిరిగి వివాహము చేసుకోరాదు. అది అనారోగ్యముతో ఉన్నవాడు త్రాగుడుకు బానిసగా మారినట్లు అగుతుంది. అందు చేత తిరిగి వివాహము వద్దు."

(యింకా ఉంది)
సర్వం శ్రీసాయినాధార్పణమస్తు

సాయి.బా.ని.స. డైరీ - 1995 (02)

27.02.2012 సోమవారము

ఓం సాయి శ్రీ సాయి జయజయ సాయి
సాయిబంధువులకు బాబావారి శుభాశీస్సులు

ఈ రోజు సాయి.బా.ని.స. డైరీ - 1995 2వ. భాగాన్ని చదువుకుందాము

సాయి.బా.ని.స. డైరీ - 1995 (02)

23.01.1995

నిన్న రాత్రి నిద్రకు ముందు శ్రీసాయికి నమస్కరించి జీవితములో మంచిమార్గములో ప్రయాణము చేయటానికి సూచనలు ప్రసాదించు తండ్రి అని వేడుకొన్నాను. శ్రీసాయి అజ్ఞాత వ్యక్తి రూపములో దర్శనము యిచ్చి ప్రసాదించిన సలహాలు. 1) భగవంతుడు తన భక్తుల రక్షణ కొరకు తాటాకు గొడుగు తయారు చేసి యిస్తాడు.

ఆగొడుగును భక్తుడు తన తలపై ధరించటానికి తనే ప్రయత్నము చేయాలి. అంతేగాని యితరుల సహాయము కోరరాదు. 2) నీజీవిత విధానము నీ వీధిలోనివారికి యిబ్బంది కలిగించకుండా యుండాలి. 3) జీవితములో నీవు గొప్పపనులు చేసి యుండవచ్చును. నేను ఆగొప్ప పనులు చేసినాను అని గొప్పగా చెప్పరాదు. 4) నీబంధువులతోను, సాయిబంధువులతోను, ప్రేమతో జీవించు. 5) బీదవారి ధనాన్ని ఆశించకు. బీద స్త్రీలను అగౌరవము పర్చకు. 5) పదిమందితో కలసి ప్రయాణము చేస్తు కష్ఠ సుఖాలు తెలుసుకో.

24.01.1995

నిన్నరాత్రి శ్రీసాయికి నమస్కరించి మంచి మార్గములో ప్రయాణము చేయటానికి శక్తిని ప్రసాదించు తండ్రీ అని వేడుకొన్నాను. శ్రీ సాయి దృశ్యరూపములో యిచ్చిన సందేశము. 1) సమాజములోని ప్రజలు ధర్మదేవతను బంధించినారు.

ధర్మదేవతను విడిపించటానికి పధకము వేసుకొని యుక్తిగా వ్యవహరించాలి. దానికి మేధాశక్తిని ఉపయోగించాలి. అంతేగాని నీవు దెబ్బలు తిని నిరుత్సాహము పడరాదు. 2) నీవు నీయింటికి వచ్చిన వారికి దానధర్మాలు చేసేటప్పుడు నీగొప్పతనము ప్రదర్శించటానికి నీ భార్యకుకూడా చెప్పనవసరములేదు. దానము చేసేవాడికి, దానము స్వీకరించేవారికీ తెలియాలి. అప్పుడే నీలో మానసిక శక్తి పెరుగుతుంది. 3) అన్నదానము మినహాయించి మిగతా దానధర్మాలు చేటప్పుడు విచక్షణా శక్తి కలిగియుండాలి.

30.01.1995

సత్ సంగాలలో శ్రీ సాయిని గురించి మాట్లాడే సమయములో మంచి భాష మాట్లాడలేకపోతున్నానే అనే బాధ ఎక్కువ కాసాగినది. రాత్రి నిద్రకుముందు శ్రీ సాయికి నమస్కరించి నిద్రపోయినాను. శ్రీసాయి అజ్ఞాతవ్యక్త్రి రూపములో దర్శనము యిచ్చి నా సమస్యకు చూపిన పరిష్కారపు వివరాలు. 1) మనిషి తన శారీరక కోరికలు తీర్చుకోవటానికి, తన శరీరాన్ని సింగారించుకోవటానికి, కాలాన్ని, ధనాన్ని వినియోగించుతాడు. అపుడు ఆనందాన్ని అనుభవించుతాడు. కాని భక్తికి సంబంధించిన విషయాలు మనసుకు సంబంధించినవి. మనసును సింగారించలేము కాని, మనసులోని భక్తిని కాలముతో అన్వయించి ఆనందము పొందగలము. భక్తి అనేది భగవంతునికి భక్తునికి మధ్య ఉన్న భావన మాత్రమె. దానికి భాష సమస్య కాదు. 2) అకలితో యున్నవానికి అన్నము ముఖ్యము, అనారోగ్యముతో యున్నవానికి ఔషధము ముఖ్యము. అలాగే భక్తికి భావన ముఖ్యము.

(యింకా ఉంది)
సర్వం శ్రీసాయినాధార్పణమస్తు