21.05.2011 శనివారము
బాబా చెప్పిన మంచి మాటలు
ఈ రోజు మనము సచ్చరిత్ర 19 అథ్యాయములో బాబా గారు చెప్పిన కొన్ని మంచి విషయాలను చెప్పుకుందాము. కొన్ని మంచి విషయాలేమిటి? మొత్తం సచ్చరిత్ర అంతా కూడా మంచి మంచి విషయాలతో కూడి ఉన్నట్టిదే? వాటిలో కొన్ని తెలుసుకుందాము.
****
నా నామం పలకండి. నన్ను శరణనండి అని బాబా అందరికీ చెప్పారు. దానితో పాటు తాము యెవరో తెలుసుకోవటానికి తమ కథలను శ్రవణం, మననం చేయమని చెప్పారు. ఈ ప్రకారంగా కొందరికి భగవంతుడి నామస్మరణ, కొందరికి భగవంతుడి లీలలను వినటం, మరి కొందరికి భగవంతుణ్ణి పూజించటం గురించి బాబా చెప్పేవారు. వేరు వేరు అథికారాలున్న భక్తులకి వేరు వేరు నియమాలను చెప్పేవారు. కొందరికి అథ్యాత్మ రామాయణం, కొందరికి జ్ణానేశ్వరి పునశ్చరణ, కొందరికి హరివరద పారాయణం, కొందరికి గురుచరిత్ర చదవమని చెప్పేవారు. కొందరి మెళ్ళో విష్ణు సహస్ర నామావళిని కరుణతో వేసేవారు. కొందరికి రామ విజయం చదవమని చెప్పేవారు. కొందరికి థ్యానథారణ, నామస్మరణ గొప్పతనం గురించి చెప్పేవారు. ఇలా ఆయన ఇచ్చే దీక్షా పథ్థతులకు లెక్క లేదు. కొందరికి ప్రత్యక్షంగా, కొందరికి స్వప్నంలో సూచనగా ఉపదేశించే ఆయన జీవన సరళి అద్భుతం. అన్ని జాతులకి చెందిన భక్తులు బాబా దర్శనానికి వచ్చేవారు. మద్యంపై ప్రీతి ఉన్నవారి కలలోకి వెళ్ళి బాబా వాళ్ళ చాతీపై కూర్చుని చేతులతో, కాళ్ళతో అణచివేసి, మద్ద్యాన్ని యెప్పుడూ ముట్టను అని వాళ్ళతో వాగ్దానం చేయించుకునేవారు. అలా ఒట్టు పెట్టేదాకా వారిని వదిలేవారు కారు. కొందరి స్వప్నాలలోకి వెళ్ళి గురుర్ బ్రహ్మ, గురుర్ విష్ణులాంటి మంత్రాలను వ్రాసేవారు.
అందుచేత సాయి బంధువులారా, బాబా నామాన్ని పలకండి. నామ స్మరణ చేయండి. లిఖిత జపం కూడా చేయండి.
నేను ఒక వారం క్రితం నా బదిలీ గురించి లిఖిత జపం మొదలు పెట్టాను. వారం రోజులలోనే బాబా వారు నామీద దయ తలచి అతి తొందరగా బదిలీ ఇప్పించారు. బాబా కి నేను సదా కృతజ్ణుడిని. ఓం సాయిరాం.
ఈ రోజు హైదరాబాదునుంచి శ్రీ నగేష్ గారు బాబా భజన పాట ఒకటి పంపించారు. వారు ఈ పాటను బాబా భజనలో పాడుకుంటారుట. శ్రీ నగేష్ గారికి బాబా వారి ఆశీర్వాదములు.
త్యాగరాజు గారు ,అందరికి బాబా ఆశిర్వధములు ,
మేము బాబా భజనలో పాడుకొనే ఒక పాటను బాబా బంధువులందరికీ బాబా కృపతో అందిస్తున్నాను
శరణం శరణం శరనమయా
సాయి శరణం శరణం శరనమయా
సాయి పాదములే శరనమయా || శరణం||
ఎందుకు ఈ దేహం సాయి దీక్షను పూననిదే
ఎందుకు ఈ జన్మ షిర్డీ యాత్రను చేయనిదే || శరణం||
ఎందుకు ఈ శిరసు సాయి పాదుక మోయనిదే
ఎందుకు ఈ బుజము సాయి పల్లకి మోయనిదే || శరణం||
ఎందుకు ఈ కనులు సాయి రూపము చూడనిదే
ఎందుకు ఈ కరము సాయి పూజలు చేయనిదే ||శరణం||
ఎందుకు ఈ హృదయం సాయి కోవెల కట్టనిదే
ఎందుకు ఈ మనసు సాయి ద్యానము చేయనిదే || శరణం||
ఎందుకు ఈ గలము సాయి శరణము చెప్పనిదే
ఎందుకు ఈ గలము సాయి నామము పలకనిదే ||శరణం||
ఎక్కడ కైలాసం సాయి ఎక్కడ వైకుంటం
శిర్డే కైలాసం సాయి సన్నిదే వైకుంటం ||శరణం||
శరణం శరణం శరనమయా
సాయి శరణం శరణం శరనమయా
సాయి పాదములే శరనమయా
సర్వం శ్రీ సాయినాథ సమర్పయామి
ఓం సాయి శ్రీ సాయి జయ జయ సాయి
సర్వం శ్రీ సాయినాథార్పణమస్తు
